Një tjetër ngjarje jo e hijshme e ka prekur futbollin vendor. Gjatë përballjes së sotme mes Kikës dhe skuadrës së Vushtrrisë u sulmua referi, gjë që çoi në ndërprerjen e ndeshjes.
Përballja mes Kikës dhe Vushtrrisë, që ishte e vlefshme për xhiron e 24 të Ligës së Parë të Grupit B, u karakterizua me skena dhune, raporton KosovaPress.
Në bazë të deklaratave pas ndeshjes të dy klubeve, bëhet e ditur se lojtarët e Kikës treguan sjellje jo sportive ndaj gjyqtarit të ndeshje, me ç’rast edhe ndërpritet ndeshja.
Më poshtë i gjeni deklaratat nga të dyja ekipet.
“Ndërprehet ndeshja KF Kika vs FC Vushtrria. Në minuten e 83 është ndërprerë ndeshja KF Kika – FC Vushtrria për arsye te disa sjelljeve jo sportive të lojtarëve të KF Kika ndaj referit kryesorë te ndeshjes. Rezultati ishte 1:2 në favor të FC Vushtrrisë të cilët e përmbysen rezultatin me golat e Taulant Avdylit në minuten e 63 dhe Gentrit Ullurit në minuten e 80. Presim për një vendim final për ndeshjen e sotme nga Federata e Futbollit të Kosovës”, shkruante në komunikatën e Vushtrrisë.
“Reagim. Ndjenja e keqardhjes është e natyrshme në rastin e ndeshjeve të tilla, por është e rëndësishme të ruajmë respektin për vendimet e referit dhe integritetin e lojës. Është e rëndësishme që si klub të marrim përgjegjësi për veprimet e lojtarëve tanë dhe të analizojmë situatat për të shmangur përplasje të tilla në të ardhmen. Sfidat e lojës duhet të trajtohen me sportivitet dhe respekt për të gjithë pjesëmarrësit në fushë. Gjithashtu ne si klub faleminderojm publikun që me sportivitet e ka marrur vendimin e referit. Kika mbi të gjithë”, shkruante në komunikatën e Kikës.
Kika ishte në epërsi prej 1:0 para se Vushtrria ta përmbyste rezultatin në pjesën e dytë për të avancuar më pas në 2:1, kohë kjo kur ndodhi incidenti në fjalë.
/TV Arbëria
