Deputetja e VV-së, Arbëreshë Kryeziu – Hyseni, për mosfutjen në agjendë të anëtarësimit të Kosovës në Këshillin e Evropës (KiE), ka thënë se ka ende kohë që Kosova t’i kthehet agjendës së Këshillit të Ministrave.
E pyetur se i kujt është gabimi që Kosova nuk është pjesë e kësaj agjendeje, deputetja është përgjigjur duke thënë se përgjigjja e kësaj pyetje nuk është në Kosovë.
“Unë mendoj që përgjigjja e kësaj pyetje nuk është në Kosovë, sepse besoj se çkado që është kërkuar prej instituciove tona është bërë në mënyrë që të plotësohen të gjitha kushtet dhe parakushtet që kanë qenë të vendosura për Republikën e Kosovën”, ka thënë Kryeziu – Hyseni në “Debat Plus”.
Deputetja ka thënë se bashkësia ndërkombëtare po dëshiron të na “shantazhojë” me këtë çështje për të rikthyer në diskutim çështjen e Asociacionit.
Lidhur me këtë situatë, deputetja është shprehur se Kosova nuk ka faj, sepse sipas saj, ka bërë gjithçka që i është kërkuar dhe tashmë vendi ynë “nuk ka asgjë në dorë”.
