Shkruan: Afrim Kasolli
Denoncimi nga opozita i veprimeve të pushtetit lidhur me tenderët një burimor, e ka tronditur këtë të fundit. Zbulimi i më shumë se “781 tenderëve sekret që kapin vlerën e 209 milionë eurove” e ka rrënuar pikërisht armën më të fortë retorike të këtij pushteti, se do të qeverisin me “duar të pastra”.
Pra në fund të fundit, edhe nëse ajo ka mundur të justifikohet para opinionit lidhur me marrëveshjet ndërkombëtare me Serbinë, apo sikur se zbatimin dje të vendimit të Gjykatës Kushtetuese për regjistrimin e 24 hektarëve tokë si pronë e Manastirit të Deçanit, edhe pse në vazhdimësi e kishte kundërshtuar një gjë të tillë, apo nesër edhe detyrimin për ta zbatuar Asociacionin për komunat me shumicë serbe, si një trashëgimi i së kaluarës, kur është puna të tenderët një burimor, ato janë rezultat i drejtpërdrejtë e aksioneve të saj, ku nuk mund të shfaqet si viktimë e qeverisjeve të kaluara.
Mirëpo, çuditërisht zyrtarët qeveritarë kanë filluar t’i përdorin si argument mbrojtës për shpërdorimet e tyre edhe në këtë rast qeverisjet e kaluara, krahas edhe dy metodave tjera. Kështu si dje edhe sot eksponentë të pushtetit, kanë filluar të tregojnë “vlerën e kontratave njëburimore gjatë viteve 2015-2017, sipas së cilës vlera e kontratave të negociuara në mënyrë direke kishte kapur shifrën 44.6 milionë euro, vetëm për dy vjet”. Pra në këtë mënyrë qeverisja e Albin Kurtit, po e transmeton mesazhin se është e vërtetë se “duart tona të pastra” tashmë janë bërë “të ndyta” nga veset e pushtetit, por nuk është se një gjë e tillë nuk ka ndodhur edhe në të kaluarën. Thjesht jemi duke bërë diçka që e kanë bërë edhe tjerët para nesh, madje ende jo në përmasat e tyre.
Sidoqoftë, përtej këtij relativizmi cinik të këtyre abuzimeve, shumica parlamentare është duke u angazhuar që detajet e tyre as të mos bëhen publike, duke e sabotuar punën e komisioneve hetimore parlamentare. Dhe në fund që ato të harrohen duke blerë kohë sa më shumë që të jetë e mundur, ashtu siç i kishte urdhëruar dje Shefja e Grupit Parlamentar të Vetëvendosjes, Mimoza Kusari deputetet e kësaj partie.
Megjithatë, kjo strategji e formëson tablonë e një krimi të trefishtë. Një atë të shpërdorimit të financave publike nëpërmjet tenderëve një burimor, dy minimin e punës së Kuvendit të Kosovës për t’i hetuar ata, dhe tre vjedhjen e kohës nga pushteti. E nuk ka abuzim më të madh se sa ky i fundit, sepse siç thotë një sentencë ikonike, që e kam cituar disa herë, nga filmi “Gone with the wind”- “Do not squander time, for that is the stuff life is made of”.
/TV Arbëria
