Në ditën e dëshmorëve nën patronatin e Kryetarit të Komunës, Shpejtim Bulliqi dhe në bashkëpunim me shoqatat e dala nga lufta janë organizuar homazhe në shumë komplekse të varrezave të dëshmorëve dhe heronjve të kombit.
Homazhe dhe janë vendosur lule pranë busteve të Katër Dëshmorëve në sheshin e qytetit, tek busti i Ali Ajetit, shtatorja e Adem Demaçit, “Kompleksi Memorial Zahir Pajaziti” në Orllan, tek “Kompleksi Memorial Baza e Parë e UÇK-së” në Lladoc dhe “Kompleksi Memorial i Dëshmorëve” në Penuhë për të nderuar veprën heroike dhe sakrificën e e dëshmorëve që dhanë jetën për lirinë e Kosovës.
Kryetari Bulliqi në fjalën e tij në shënim të kësaj dite tha se “Dëshmorët janë më meritorët për lirinë e fituar, gjaku i derdhur për liri dhe sakrifica e shumë brezave na obligon neve të gjallëve për punë të mira e kontribut të pakursyer për ndërtimin dhe forcimin e vendit tonë”.
Krahas homazheve në Kompleksin Memorial të Dëshmorëve u bë edhe hapja e Muzeut të Dëshmorëve, ku edhe u mbajt manifestimi qendror për shënimin e kësaj dite.
Në këtë manifestim për Hapjen e Muzeut fjalë rasti mbajtën; Kryetari i Komunës, Shpejtim Bulliqi, zëvendës komandanti i ZOLL-it gjenerali Kadri Kastrati dhe përfaqësuesi i OVL-UÇK, Xhemshit Gashi.
Kryetari Bulliqi për hapjen e muzeut tha” Hapja e muzeut është një moment i rëndësishëm për të ruajtur dhe për të rrëfyer historinë tonë para botës dhe brezave të ardhshëm. Ky muze është një vend i veçantë ku mund të mësojmë për heroizmin dhe sakrificën e dëshmorëve tanë, dhe për të ruajtur kujtimin e tyre për brezat e ardhshëm.
Lavdi të gjithë dëshmorëve, heronjve dhe martirëve të kombit!”