Mbyllja e rrjetit të lajmeve Al Jazeera nga kryeministri izraelit Benjamin Netanyahu të dielën është kritikuar nga autoritetet gjermane, raporton CNN.
“Një peizazh i lirë dhe i larmishëm i shtypit është një gur themeli i rëndësishëm i çdo demokracie liberale. Sidomos në kohë krize, është veçanërisht e rëndësishme të mbrohet liria e shtypit. Vendimi i autoriteteve izraelite për ta mbyllur AlJazeeran në Izrael dërgon sinjalin e gabuar”, tha Ministria e Jashtme gjermane të hënën.
Grupet e të drejtave të njeriut dënuan lëvizjen e autoriteteve izraelite për ta mbyllur rrjetin me bazë në Katar, i cili ka prodhuar në terren raportime të vazhdueshme të fushatës ushtarake të Izraelit në Gaza.
Shqetësimet rriten: Ministria izraelite e Komunikimeve tha të dielën se i kishte mbyllur zyrat e Al Jazeera-s në Jerusalem dhe se kishte konfiskuar pajisjet e saj të komunikimit. Qeveria e Netanyahut akuzoi kanalin për paragjykime anti-izraelite dhe se ishte një “zëdhënës i Hamasit”.
Al Jazeera mohoi përsëri “akuzat e rreme të Izraelit në lidhje me shkeljen tonë të kornizave profesionale që rregullojnë punën e medias”.
Masa për mbylljen e rrjetit vjen mes shqetësimeve në rritje nga grupet e lirisë së shtypit për viktimat mes gazetarëve që operojnë në zonat e luftës dhe atë që ata e përshkruajnë si pengim i punës gazetareske nga autoritetet izraelite.
