Deputeti i PDK-së, Xhavit Haliti thotë se çështja e dinarit ka vetëm një qëllim, shtyerjen e marrëveshjeve të dakorduara nga Kosova dhe Serbia.
Haliti në një prononcim për GazetaBlic thotë se ato marrëveshje veç se janë të nënshkruara.
“Mendoj që problemi i dinarit dhe përdorimi i tij, është një çështje e stisur me qëllim që të shtyhet sa më shumë fillimi i zbatimit të marrëveshjeve të nënshkruara e zotuara nga Kosova e Serbia ose më mirë të themi: Marrëveshjet e nënshkruara dhe të zotuara nga të dy Qeveritë. Besoj që marrëveshje për vazhdimin përdorimit të përkohshëm, do arrihet sipas propozimeve euroamerikane”, tha Haliti.
Teksa foli për dinarin, Haliti shton se e çuditshme është edhe biseda telefonike që sot është zhvilluar mes kancelarit gjerman, Olaf Scholz, dhe kryeministrit të Kosovës, Albin Kurti.
Madje ai paralajmëron se gjatë ditëve në vijim do të mësohet edhe më shumë.
“Dua ta potencoi se edhe takimi i Kurtit me përfaqësuesin e SHBA në Gjermani ishte i çuditshëm , sepse ai takim duhej të mbahej në Ambasadën e SHBA dhe në zyrën e Kryeministrit të Kosovës. Takim për të cilin besoj që gjatë ditëve në vijim do mësojmë më shumë”, tha Haliti.
Në fund, Haliti shton se përdorimi i dinarit në vendin tonë, është në favor të Kosovës.
“Besoj që përdorimi i përkohshëm i dinarit, Kosovës i sjell prioritet dhe e vë në pozicion më të favorshëm në raportet me BE-në e ShBA-në”, tha Haliti për GazetaBlic.
