Katër anëtarë të dyshuar të një grupi kriminal të trafikimit të parave nga Britania e Madhe drejt Shqipërisë janë arrestuar nga autoritetet britanike.
Të dyshuarit u arrestuan më 13 prill në një seri bastisjesh të koordinuara që filluan me arrestimin e një shtetasi shqiptar 48-vjeçar në Dover.
Rreth 200 mijë funte u sekuestruan në automjetin e tij, i cili ishte rrugës për në Shqipëri. Dy persona të tjerë, të moshës 34 dhe 22-vjeç, dhe një djalë 17-vjeçar u arrestuan në Tottenham Hale, Londër, me rreth 150 mijë funte në automjetin e tyre.
Arrestimet vijnë pas një hetimi dyvjeçar, pasi Forcat Kufitare ndaluan 48-vjeçarin në kontrollet e tunelit Channel në Folkestone, Kent. Brenda furgonit të tij Mercedes Sprinter, i cili ishte nisur për në Tiranë, oficerët gjetën gjithsej 390 mijë funte të mbështjella në pako të ndryshme.
Shtëpia e të dyshuarit në Haringey, Londër, u kontrollua dhe oficerët zbuluan 150 mijë funte të tjera në para. 34-vjeçari ishte arrestuar më parë në shtator 2022, kur oficerët zbuluan mbi 20 mijë funte në makinën e tij.
Në gusht 2023, u sekuestruan edhe 43.980 funte të tjera, të cilat besohej se ishin të destinuara për t’u transportuar nga grupi.
Të dy personat mbetën nën hetim derisa u arrestuan sërish të shtunën. Që atëherë ata janë liruar me kusht. 22-vjeçari dhe djali 17-vjeçar u lanë të lirë nën hetim në pritje të hetimeve të mëtejshme, raportojnë mediat britanike.
Menaxheri i operacioneve të NCA, Paul Orchard tha se “shpëlarësit e parave u mundësojnë kriminelëve të tjerë të organizuar si tregtarët e drogës dhe armëve të zjarrit të kryejnë veprat e tyre të tmerrshme që dëmtojnë shoqërinë”.
“Degradimi i aftësisë së grupeve të krimit të organizuar për të larë paratë e tyre është një prioritet për NCA në misionin e saj për të mbrojtur publikun. Qëllimi i krimit të organizuar është të fitojë para, kështu që duke e ndjekur atë dhe ata që e pastrojnë atë, ne po synojmë zemrën e modelit të biznesit kriminal,” tha ai.
/TV Arbëria
