Ish-shefi i UNMIK-ut, Joachim Ruecker, është shprehur optimist për heqjen e masave ndëshkuese të BE-së ndaj Kosovës.
Ai ka bërë me dije se pas mbajtjes së ‘referendumit’ të dielën për largimin e kryetarëve të veriut, tashmë është çështje kohe heqja e këtyre masave.
Në një intervistë për në “Lajmet e Fundit” në RTK, ai ka thënë se institucionet e Kosovës tashmë kanë bërë të gjitha veprimet e duhur për largimin e këtyre masave.
“Mendoj se është çështje kohe, sepse të gjitha hapat tashmë janë marrë dhe u bë votimi për tërheqjen e kryetarëve të komunave. Tentimi u bë që të zgjidhet situata politike në katër komunat në veri dhe mendoj se qeveria juaj është në drejtim të duhur dhe besoj se këto përpjekje do të njihen nga BE-ja dhe do të vazhdojnë projektet që janë pezulluar për momentin”, ka thënë Ruecker.
Ish-shefi i UNMIK-ut ka folur edhe për procesin e dialogut Kosovë-Serbi.
Ai ka vlerësuar se Kosova duhet t`i përmbush të gjitha obligimet që i ka marrë në këtë proces.
Sipas tij, Kosova duhet ta themelojë edhe Asociacionin e Komunave me Shumicë Serbe.
“Ju e përmendët marrëveshjen e Ohrit dhe hapat e ardhshëm janë të qartë, duhet të formalizohet dhe mendimi im është që duhet të vazhdohet në mënyrë substanciale realizimi i kësaj marrëveshjeje, por Kosova duhet të merret edhe me themelimin e Asociacionit të Komunave me shumicë serbe dhe të kemi njohje ‘de-fakt’o nga Serbia, ndoshta ata nuk e implementojnë, këtë por kjo duhet të vihet në vijën e finishit. Është mjaft e qartë nga ana e BE-së se këto gjëra duhet të ndodhin”, është shprehur Ruecker.