Njohësi i çështjeve të sigurisë, Fadil Kajtazi, në një prononcim për TV Arbërinë ka raportuar nga kufiri Kosovë-Serbi, afër fshatit shqiptar Dobrosin, duke treguar për situatën atje rreth analizës mbi koncentrimin e bazave të ushtrisë së Serbisë që shtrihen në Kosovë, rrezikut dhe sigurisë që sipas tij varet nga politika që e bëjnë strukturat shtetërore të Kosovës.
“Ndërsa në qoftë se flasim për sigurinë nacionale, shkenca e këtij drejtimi thotë se elementet strategjikë të sigurisë nacionale janë politika e jashtme, politika ekonomike dhe politika e mbrojtjes e vlen për të gjitha shtetet, kjo renditje vlen edhe për ShBA-të, që është superfuqi botërore”, tha ai.
Sa i përket politikës së jashtme, sidomos në këto vitet e fundit të qeverisë aktuale ai theksoi se ky faktor strategjik (politika e jashtme) është duke lënguar shumë.
Kajtazi përshkroi edhe zonën që nga Presheva e deri te Istogu, për të cilën tha se ka një koncentrim më të madh të ushtrisë serbe.
“Serbët rreth Kosovës kanë tri brigada të mekanizuara të përziera dhe koncentrimi më i madh është te kjo zonë për arsye se kjo zonë favorizon përdorimin e mjeteve të blinduara për të cilat konsiderohen se ata janë superiorë, që në fakt janë ashtu”, tha ai.
Njohësi i çështjeve të sigurisë, Fadil Kajtazi, e zbulon taktikën ushtarake të Serbisë.
Ai tha se në planin e përgjithshëm strategjik, serbët e llogarisin Kosovën me e sulmu në tre drejtime siç i kanë ata të ndara, drejtimi i Moravës, drejtimi i Merdarit dhe drejtimi i Ibrit.
Video e plotë:
/TV Arbëria
