Komiteti i Ministrave i të Këshillit të Evropës më 16 maj do të vendos përfundimisht pro apo kundër anëtarësimit të Kosovës në KiE.
Pas marrjes së dritës së gjelbër në Asamblenë Parlamentare të KiE-së, më 16 prill, Serbia njoftoi se ka ngritur një grup punues për ta penguar anëtarësimin e Kosovës në këtë organizatë.
Kosova ende nuk e di nëse Ukraina do të votojë pro anëtarësimit në KiE, përkundër që deklarimeve pozitive të deputetëve në KiE.
Shefi i Komisionit Parlamentar në Ukrainë, deputeti Oleksandr Merezhko, në një prononcim për Telegrafin, ka thënë se nuk e di nëse shteti i tij do të përkrahë Kosovën Komitetin e Ministrave.
Ai thekson se nëse do të ishte në dorën e tij, patjetër që do të votonte pro.
“Sinqerisht, nuk e di nëse do të votojë pozitivisht për anëtarësimin e Kosovës në Këshillin e Evropës. Nëse do të ishte në dorën time unë patjetër do të votoja pro anëtarësimit të Kosovës sepse Kosova vërtet e meriton. Për mua, Kosova është mikja e Ukrainës dhe ne duhet të qëndrojmë së bashku dhe të mbështesim njëri-tjetrin”, u shpreh Merezhko.
Deputeti ukrainas tha se populli i Kosovës ishte viktimë e gjenocidit të Serbisë gjatë 1998/99, dhe tani populli i Ukrainës, prandaj e kuptojnë njëra tjetrën.
“Ne e kuptojmë njëri-tjetrin dhe duhet të bëjmë gjithçka që është e mundur së bashku që autorët e gjenocidit të mos të mbeten pa u ndëshkuar”, tha Merzheko.
Kush votoi KUNDËR në Asamblenë Parlamentare?
Kundër anëtarësimit të Kosovës në Këshillin e Evropës votuan 29 deputetë.
Tetë (8) përfaqësues të Spanjës votuan kundër raportit të raportueses Dora Bakojani (Dora Bakoyannis ) e cila rekomandoi dritë të gjelbër për Kosovën.
Kundër Kosovës ishin: Katër (4) përfaqësues nga Hungaria, dy (2) përfaqësues nga Qiproja, një (1) greke dhe një (1) gjerman. Kundër Kosovës votuan edhe dy (2) përfaqësues nga Franca dhe një (1) italian.
Kundër anëtarësimit të Kosovës ishin edhe shtatë (7) anëtarët e delegacionit të Serbisë, Maja Vukiqeviq nga Mali i Zi si dhe Snjezhana Novakoviq dhe Branisllav Borenoviq nga Bosnja dhe Hercegovina. Një(1) përfaqësues tjetër i Malit të Zi votoi në favor të Kosovës.
Të përmbajtur ishin 11 delegatë: Një (1) malazias, gjashtë (6) italianë, tre (3) të Moldavisë dhe një (1) gjerman.
Përkundër faktit se Athina nuk e njeh pavarësinë e Kosovës, katër (4) përfaqësues të Greqisë, midis të cilëve edhe Dora Bakojani, votuan për pranimin e Kosovës.
Këshilli i Evropës
I përbërë prej 46 shtetesh anëtare, 27 prej të cilave anëtare të Bashkimit Evropian, Këshilli i Evropës është organizata kryesore e kontinentit për të drejtat e njeriut.
Anëtarësimi në Këshillin e Evropës do të nënkuptonte, mes tjerash, përfaqësimin e parlamentarëve të saj në Asamblenë Parlamentare të organizatës.
Kosovarët, po ashtu, do të mund t’i paraqisnin rastet e tyre në Gjykatën Evropiane për të Drejtat e Njeriut.
Vendi do t’i bashkohej edhe Unionit të Transmetuesve Evropianë, duke i hapur rrugë pjesëmarrjes së tij në garën vjetore të këngës, Eurovizion./Telegrafi/
