Tre qytetarë nga Kosova janë arrestuar në Sarandë, pasi janë kapur në flagrancë duke transportuar kundrejt fitimit, 26 emigrantë me qëllim kalimin e paligjshëm të kufirit.
Policia e Shtetit ka njoftuar se të dyshuarit janë Sh. Sh., 25 vjeç, H. H., 22 vjeç dhe Sh. I., 47 vjeç – të tre banues në Kosovë.
Sipas njoftimit, me arrestimin e tyre është finalizuar operacioni policor i koduar “Border”, për goditjen e veprimtarisë kriminale të transportimit të emigrantëve, kundrejt fitimit, për të kaluar ilegalisht në vendet e BE-së.
“Bashkëpunuan për të transportuar me 3 automjete, 26 emigrantë, me qëllim kalimin e paligjshëm të kufirit, kapen në flagrancë dhe arrestohen 3 shtetas”, thuhet në komunikatë.
Të arrestuarve iu janë sekuestruar automjetet me të cilat kryenin transportimin, dhe celularët.
“Ky operacion, i dyti brenda pak ditëve, i finalizuar nga Policia Kufitare e Sarandës për goditjen e ndihmës së kundërligjshme, për emigrantët”, thuhet tutje.
Materialet procedurale i kaluan Prokurorisë pranë Gjykatës së Rrethit Gjyqësor Sarandë, për veprime të mëtejshme, për veprën penale “Ndihma për kalim të paligjshëm të kufijve”, kryer në bashkëpunim.
/TV Arbëria
