Federata e Futbollit të Kosovës (FFK) përmes një komunikate zyrtare ka njoftuar se ka arritur marrëveshje për vazhdimin e kontratës për stadiumin “Fadil Vokrri” me Komunën e Prishtinës.
Presidenti i FFK-së, Agim Ademi dhe kryetari i Prishtinës, Përparim Rama nënshkruan marrëveshjen sot.
Marrëveshja thotë se FFK-ja do ta menaxhojë dhe shfrytëzojë stadiumin “Fadil Vokrri” edhe për pesë vitet e ardhshme.
Presidenti Ademi falënderoi të parin e Prishtinës, ndërsa theksoi se ky objekt është interes nacional, duke pasur parasysh se është arena e vetme në të cilën zhvillohen ndeshjet e Kombëtares, por edhe të klubeve tona në arenën evropiane.
Po ashtu, Ademi bëri të ditur se do të fillojë menjëherë procesi për përmirësimin e fushës, që ajo të jetë në gjendjen më të mirë për ndeshjet e ciklit kualifikues për Euro 2024, të cilat fillojnë në muajin mars, 2023.
Ademi shprehi gatishmërinë e FFK-së për investime kapitale në këtë stadium në të ardhmen, bashkë me komunën dhe me ministrinë e Sportit, duke përfshirë projektin e rritjes së kapacitetit, por edhe të modernizimit të mëtejmë të objektit në tërësi, pasi siç ka thënë, ky stadium është simbol jo vetëm i kryeqytetit, por edhe i vendit tonë.
Ndërkaq, kërkesa e vetme e presidentit të FFK-së ishte që përgjatë këtij afati pesëvjeçar kryeqyteti të bëhet me stadium të ri, i cili do të mundësonte kushte më të mira për ndeshjet ndërkombëtare, por njëherësh edhe lirimin e stadiumit “Fadil Vokrri” nga mbingarkesa e ndeshjeve. /TV Arbëria
