Deputeti i Aleancës për Ardhmërinë e Kosovës (AAK), Pal Lekaj ka bërë të ditur se ka vizituar sot ish-krerët e UÇK-së Hashim Thaçin dhe të tjerët në Hagë.
Ai me këtë rast ka theksuar se të gjithë pa përjashtim po qëndronin krenarë dhe të palëkundur se kjo është vetëm një sfidë e radhës ndër dhjetëra të tjera në këto tri dekada sfide, por të bindur se do të arrijnë ta ngritin në piedestal pastërtinë e luftës tonë për liri e shtet.
Postimi i plotë:
Sot nga ora 9:00 deri në ora 16:00 kisha nderin dhe privilegjin e veçantë të takoja për orë të tëra miqtë e mi Hashim Thaçi, Kadri Veseli, Rexhep Selimi, Jakup Krasniqi, Hysni Gucatin, Nasim Haradinaj dhe Pjetër Shala.
Një emocion i veçantë për mua të takoj sot në rrethana krejtësisht të pa logjikshme njerëzit, të cilët janë e kaluara e lavdishme, e tashmja shtet-ndërtuese dhe e ardhmja historike e Kosovës. Të gjithë pa përjashtim po qëndronin krenarë dhe të palëkundur se kjo është vetëm një sfidë e radhës ndër dhjetëra të tjera në këto tri dekada sfide sa do e pa drejt por të bindur se do të arrijnë ta ngritin në piedestal pastërtinë e luftës tonë për liri e shtet.
Ndër shumë momente sot që më bën krenar ishte edhe takim i shkurtër me komandant Calin. I pathyeshëm dhe shumë i bindur që në fund do të dalë triumfues. Në fund të gjithë pa përjashtim më thanë t’ju përcjell urimet më të mira në vigjilje të Krishtlindjeve dhe Vitit të Ri.
Sot më shumë se kurrë jam krenar që isha bashkëpunëtor i juaji në periudhat më të rëndësishme të popullit tonë për liri e pavarësi.
Ne besojmë në lirinë tuaj dhe ju jam përjetësisht falënderues për gjithë kontributin e dhënë në të gjitha etapat e mbi të gjitha në këto momente që po mbroni luftën e drejtë të popullit tonë!
