Asnjëri prej 2 kandidatëve që kanë hyrë në test me shkrim për t’u bërë drejtor i Spitalit të Ferizajt, Ragip Bytyqi dhe Gzim Shala nuk e kanë kaluar testin me shkrim.
E kandidati i tretë, Jeton Zeqiri nuk ka hyrë fare në test, ndonëse kishte kaluar fazën e parë të aplikimit.
Këtë për KALLXO.com e ka konfirmuar shefi i burimeve njerëzore në Shërbimin Spitalor Klinik e Universitar të Kosovës, Alban Janova, i cili ishte edhe anëtar i Komisionit vlerësues.
Janova tha se për shkak të kësaj, konkursi do të anulohet.
Nga 70 pikë gjithsej, Bytyqi, kirurg në këtë spital ka marrë 31 pikë, ndërsa Shala, shef i prokurimit në Spitalin e Gjilanit ka marrë 15 pikë.
Zeqiri kishte udhëhequr Spitalin e Ferizajt për tri vjet deri në gusht të vitit 2021.
Prej atëherë, ky spital është udhëhequr në vazhdimësi nga ushtrues të detyrës, aktualisht në krye të tij është ushtruesi i detyrës së drejtorit, Fikret Arifi.
Komisioni vlerësues i këtij konkursi përbëhej edhe nga kryesuesja Shefkije Shatri – drejtoreshë e Spitalit të Vushtrrisë, dhe anëtarët: Ardian Shefkiu – drejtor i Departamentit për Shërbime Shëndetësore në ShSKUK, Gëzim Murseli – drejtor i Mjekësisë Sportive dhe Zana Morina – zyrtare ligjore në ShSKUK.
/TV Arbëria
