Ish-kryediplomati i Kosovës, Enver Hoxhaj, ka thënë se Kosova plotëson të gjitha kriteret për anëtarësim në Këshill të Evropës. Në një intervistë për News24, ai ka shtuar se shtetet anëtare kanë shprehur qëndrimet e tyre me votat e tyre në Asamblenë Parlamentare të Këshillit të Europës, megjithëse ka pasur përpjekje për të lidhur anëtarësimin me krijimin e Asociacionit të komunave me shumicë serbe.
Ai ka thënë se hapi i ardhshëm për Kosovën pas anëtarësimit në Këshillin e Europës duhet të jetë pranimi në NATO.
“Kosova i plotëson të gjitha kriteret. Jemi shteti më i ri por pretendojmë se jemi demokracia më e konsoliduar në rajon. I përmbushim të gjitha standardet që duhen që një vend të jetë në KiE. Pas NATO dhe BE, KiE është organizata e tretë më e rëndësishme në Evropë. Për Kosovën do të ishte një vulosje e re e shtetësisë së saj si vend evropian, dhe ky anëtarësim do të ishte shumë i rëndësishëm. Shtetet anëtare kanë reflektuar qëndrimet e tyre me votat e dhëna në Asamblenë Parlamentare të KiE”.
“Po dëgjoj që ka një përpjekje për ta kushtëzuar me themelimin e Asociacionit anëtarësimin si një kusht i fundit paraprak. Mendoj se është diçka e padrejtë që i bëhet Kosovës duke ditur se i përmbush kriteret. Kjo është një mënyrë se si shtetet e mëdha bëjnë politikat në raport me shtetet e tjera si Kosova. Është një praktikë e zakonshme. Pas këtij ndryshimi të madh gjeopolitik, hapi i radhës duhet të jetë NATO-ja”, tha Hoxhaj.