Organi qeverisës evropian i futbollit, UEFA e ka gjobitur Barcelonën me një shumë prej 25 mijë eurove.
Ky dënim nga UEFA vjen si pasojë e fyerjeve raciste nga tifozët e Barçës në ndeshjen kundër Paris Saint-Germain në Ligën e Kampionëve.
Më datën 10 prill policia e Parisit kishte marrë në pyetje dy persona pas videove të publikuara në rrjetet sociale të një tifozi që bënte sjellje majmuni dhe një tjetër që përshëndettë në formë naziste në “Parc des Princes”.
“Organi i Apelit i UEFA-s ka vendosur të gjobisë Barcelonën me 25,000 euro dhe të ndalojë Barcelonën që t’u shesë bileta tifozëve të saj jashtë vendit për ndeshjen e radhës në garat e UEFA-s, për sjelljen raciste të tifozëve të saj. Ndalimi i përmendur për shitjen e biletave për tifozët e saj largohet për një periudhë prove prej një viti, duke filluar nga data e këtij vendimi”, thuhet në vendimin e UEFA-s.
/TV Arbëria
