Dibra vitet e fundit është kthyer në një nga destinacionet e preferuara të turistëve vendas e të huaj të pasionuar pas natyrës dhe sporteve të aventurës.
Zëvendëskryeministrja njëherësh ministrja e Infrastrukturës dhe Energjisë dhe drejtuese politike e qarkut të Dibrës, Belinda Balluku ndau në rrjetet sociale pamje nga lumi Drin, ku ushtrohet sporti i bukur i rafting dhe nga bjeshkët e Zimurit, ku të pasionuarit pas paragliding e ushtrojnë atë duke shijuar pamjet mahnitëse.
“Turistë nga vende të ndryshme kanë mbërritur për rafting në lumin Drin. Por jo shumë larg prej andej në bjeshkët e Zimurit ka nga ata që duan më shumë adrenalinë përmes paragliding”, theksoi Balluku.
Pushuesit dhe turistët, që zgjedhin për të vizituar Dibrën kanë një mundësi më shumë për turizëm, pasi lumi Drin bashkë me luginën e tij piktoreske ofron mundësi mjaft të mira për rafting, duke i hapur rrugë zhvillimit të turizmit të aventurës në një destinacion të ri turistik.
Drini është një degë e lumit më të gjatë në Shqipëri dhe një nga destinacionet tërheqëse të vendit tonë për pasionantët pas sporteve ujore. Kanionet e Drinit dhe larmishmëria e rrjedhjes së lumit janë fantastike për sportin e aventurës së rafting.
Në Dibër mund të vizitohen dhe objektet e trashëgimisë kulturore dhe historike si Ura e Vashës, e cila ndodhet mbi lumin Mat në lindje të rrugës së fshatit Guri i Bardhë. Ura është ndërtuar në fillim të shekullit të 19 me gurë lumi, me gjatësi 11 metër dhe gjerësi 2.8 metër. Por, nuk mungojnë as objektet e kultit, një prej të cilave është edhe Kisha e Shën Mitrit e ndërtuar në vitin 1892, e shpallur ‘Monument Kulture’ në vitin 2007.
Turistët kanë mundësi të eksplorojnë edhe destinacione si; Grama, Korabi, Lura, Kanionet e Setës, ujëvara e Sopanikës, Kalaja e Grezhdanit, kishat e vjetra të Kërçishtit dhe fshatin e gurtë të Rabdishtit.
/k.s/
