Qeveria e Kosovës ka marrë vendim që pas 1 shkurtit të largohet dinari serb nga përdorimi
Ky vendim është duke u shoqëruar me dallime në mes të Kosovës dhe Komunitetit Ndërkombëtar për rregulloren e re të Bankës Qendrore të Kosovës për ndalimin e dinarit serb në vendbanimet me shumicë serbe.
Safet Gërxhaliu, njohësi i ekonomisë tha se ky vendim është i qëlluar por rrethanat janë shqetësuese dhe po e dëmtojnë Kosovën më tepër.
“Kur bëhet fjalë mes raporteve serbo-shqiptare, mes Kosovës dhe Serbisë asgjë nuk është ekonomike sepse çdo gjë merr ngjyrën dhe konotacion politik, në këtë drejtim besoj që vendimi i Kosovës është i qëlluar është i duhur, mirëpo rrethanat janë shqetësuese dhe definitivisht po e dëmtojnë Kosovën më tepër, po ndodh një vendim i tillë në kohën kur jemi në procesin e dialogut që për disa thuhet është në fazën finale, për disa është i pashpresë”.
Ndërkaq deputeti nga radhët e LVV, Mefail Bajqinovci tha se çështja e largimit të dinarit nga Republika e Kosovës do të shkojë deri në fund pasi valuta e vetme legale në Republikën e Kosovës është euro.
“Dinari duhet të largohet sepse është ilegalisht në Republikën e Kosovës, ne e dimë që valuta e vetme legale në Republikën e Kosovës është euro dhe kjo punë do të shkoj deri në fund. Qeveria e Kosovës nuk do të lëshojë pe në asnjë moment aty ku shkelet kushtetua dhe ligjet e Republikës së Kosovës, andaj edhe dinari duhet të jetë i larguar nga përdorimi pa marrë parasysh në cilat komuna janë”.
Ndryshe, kërkesë për shtyrjen e zbatimit të rregullores së BQK-së për operacionet me para të gatshme më herët kanë bërë edhe Shtetet e Bashkuara, por edhe shtetet e tjera të QUINT-it – Italia, Gjermania, Franca dhe Britania. /TV Arbëria
