Miqësorja e dytë ndërmjet Kosovës dhe Bullgarisë për grupmoshën deri 15-vjeç, ka qenë reprizë e miqësores së parë, jo vetëm sa i përket rezultatit, por edhe sa i përket rrjedhshmërisë së lojës.
Në ndeshjen që u zhvillua në Kampin Nacional të FFK-së në Hajvali, Kombëtarja e Kosovës në grupmoshat U15 barazoi 1:1 me Bullgarinë, raporton KosovaPress.
Fillimisht, të parët në epërsi kaluan bullgarët përmes golit me kokë në minutën e 16’ nga Petar Blagoev.
Ndërkaq, golin e barazimit për “Dardanët” e rinj e shënoi Albion Rexhepi, i cili shënoi në minutën e 69’ për 1:1.
Përzgjedhësi Ilir Nallbani i vlerësoi këto dy miqësore si shumë të rëndësishme për këtë gjeneratë të futbollistëve, e cila tash e tutje për shkak të moshës do të vazhdojë me Kombëtaren U16 nën drejtimin e Mehmet Kurdës.
