Presidenti i SHBA-së Donald Trump ka zbuluar planet e tij rreth një kandidature të re të mundshme për një mandat të tretë, pas spekulimeve javëve të fundit për shkak të produkteve që ai shet në faqen e tij zyrtare dhe deklaratave të kaluara në të cilat ai përmendte mundësinë.
“Unë do të jem president për tetë vjet, president për dy mandate. Gjithmonë e kam ndjerë se është e rëndësishme,” tha Trump në një intervistë me NBC sot.
Trump tha se do të donte të kishte një mandat të tretë apo edhe të katërt, dhe më vonë pretendoi se e kishte thënë këtë për të provokuar mediat, të cilat i akuzon për përhapjen e lajmeve të rreme.
Megjithatë, fakti që Organizata Trump ka shitur kapele “Trump 2028” për disa kohë ka nxitur spekulime për ambiciet e tij të ardhshme politike, raporton KosovaPress.
“Shumë njerëz po më kërkojnë ta bëj”, tha Trump, vetëm disa ditë pasi shënoi 100 ditë në mandatin e tij të dytë.
“Është diçka që, me sa di unë, nuk lejohet. Nuk e di nëse është kushtetuese apo diçka tjetër,” shtoi ai, duke iu referuar ndalimit për një mandat të tretë.
“Shumë po shesin kapele 2028, por kjo nuk është diçka që unë po planifikoj”, theksoi ai.
Trump përmendi gjithashtu disa emra që ai i sheh si pasardhës të mundshëm: zëvendëspresidenti JD Vance dhe sekretari i Shtetit Marco Rubio.
“Unë mendoj se katër vjet janë të mjaftueshme për të bërë diçka spektakolare,” shtoi ai.
Sipas Amendamentit të 22-të të Kushtetutës së SHBA-së, askush nuk mund të zgjidhet në postin e presidentit më shumë se dy herë.
Ndryshimi i këtij rregulli do të kërkonte një shumicë prej dy të tretash në të dy dhomat e Kongresit, si dhe miratimin e tre të katërtave të shteteve.
Pavarësisht kësaj, disa mbështetës të Trump besojnë se ka një boshllëk në ligj, megjithëse është një interpretim që nuk është testuar kurrë në gjykatë.
Kur u pyet nëse dikush u përpoq ta bindte duke iu referuar asaj teorie, Trump iu shmang një përgjigjeje konkrete.
“Në cilësinë e dikujt që më mbështet shumë, shumë njerëz më kanë thënë gjëra të ndryshme”, tha ai.