Së fundmi, Fetah Bekolli, veprimtar i njohur, ka publikuar dokumentarin “30 vitet e pajtimit (1990–2020)”.
Për të folur rreth këtij dokumentari, Fetah Bekolli ka qenë i ftuar në emisionin “N’PULT”, me Resim Morinën, në TV Arbëria.
Bekolli thotë se ky dokumentar përfshin periudhën nga 14 maji 1998 deri në ditët e sotme.
“Sa i përket dokumentarit, këtu është e përfshirë periudha prej 14 majit 1998, kur jam taku me pajtimtarët e Prizrenit deri më sot. Por ajo që më ka shty, do të thotë se shumica prej tyre kaluan në botën e amshueshme, disa prej tyre janë gjallë por në gjendje të rëndë shëndetësore, dhe kisha dëshirë që familjet e tyre, por edhe mbarë populli, ta kenë nga një grimcë të historisë”
“Pajtimi i parë”: Një ngjarje që nuk harrohet
Bekolli ndalet edhe te përvoja e tij e parë në procesin e pajtimit të gjaqeve, duke kujtuar një ngjarje të veçantë që ndodhi më 21 mars 1990, në Guncat të Malishevës.
“Në pajtimin e parë, këtu në Guncat të Malishevës, më 21 mars 1990, jemi taku së bashku me Këshillin e Pajtimit të Suharekës. Së bashku e kemi kry një pajtim në Guncat të Malishevës. Do të thotë, ky është pajtimi i parë”
Emocione dhe përkushtim në një mision të shenjtë
Bekolli e përshkruan këtë mision si thellësisht emocional dhe të ngarkuar shpirtërisht, sidomos në fillimet e tij.
“Pajtimet e para nuk harrohen kurrë. Ishim fillestar në këtë mision të shenjtë, aq shumë e merrnim me shpirt, sa që ka pas raste që jemi shkri në vaj, kur fillun me tregu rrethanat e vrasjes, momentet e rënda ekonomike – ka qenë shumë shpirtërore. Pa u fut pak në lëkurën e të dëmtumit, s’mundesh me pas sukses”. /TV Arbëria