Asociacioni i Gazetarëve të Kosovës (AGK) përmes një komunikate ka bërë të ditur se është njoftuar për padinë që gazetari Naim Kryeziu dhe operatori i kamerës Fatos Rakovica kanë ngritur kundër ish-vendit të tyre të punës, Kanal 10 (Java Multimedia Production).
Sipas AGK’së, të dy kanë deklaruar se “janë larguar në mënyrë arbitrare nga puna, nuk u janë ekzekutuar dy pagat e fundit dhe nuk u janë paguar kontributet pensionale” gjatë kohës së punës në këtë media.
“AGK-ja përkrah betejën e tyre ligjore dhe e konsideron publikimin e rastit si një moment të rëndësishëm në betejën e gazetarëve dhe punonjësve medialë për të kërkuar respektimin e Ligjit të Punës”, thuhet në reagim.
Teksa AGK-ja inkurajon gazetarët, kameramanët, fotoreporterët dhe punonjësit e tjerë medialë që të kërkojnë respektimin e kontratave të punës dhe të obligimeve që dalin prej tyre, sipas Ligjit të Punës të Republikës së Kosovës.
“AGK-ja do të ofrojë përkrahje për të gjithë gazetarët dhe punonjësit medialë që shkeljet e pretenduara të kontratave t’i adresojnë në Inspektoratin e Punës dhe në gjykatat vendore”, thuhet më tej.