Rusia nisi sot sulmin e saj më të madh në muajt e fundit me “tufa” të tëra dronësh në Ukrainë, në prag të 9 majit, përvjetorit rus të humbjes së Gjermanisë naziste në Luftën e Dytë Botërore.
Ukraina festoi sot Ditën e Fitores, së bashku me pjesën tjetër të Evropës, duke ndarë simbolikisht pozicionin e saj nga Moska. Presidenti ukrainas Volodymyr Zelensky i krahasoi forcat ukrainase që luftojnë rusët me ata që luftuan nazistët.
Kryebashkiaku i Kievit, Vitali Klitschko tha se Rusia lëshoi 60 dronë të prodhuar nga Irani, 36 prej tyre synonin kryeqytetin dhe të gjithë u rrëzuan. Mbeturinat ranë mbi apartamente dhe ndërtesa të tjera, duke plagosur të paktën pesë persona në qytet, tre në Solomianski dhe dy të tjerë në Sviatosin. Shpërthime u dëgjuan gjatë gjithë natës në qytet.
Administrata ushtarake e Kievit tha se mbeturinat nga dronët ranë në pistën e aeroportit Zhulyani, një nga dy aeroportet civile të qytetit. Mbeturinat dëmtuan gjithashtu një ndërtesë dykatëshe në lagjen qendrore Shevchenkivsky.
Një magazinë ushqimore është përfshirë nga flakët në Odessa pasi u godit nga një raketë. Zyrtarët lokalë thanë se tre persona u plagosën. Kryqi i Kuq sqaroi se e gjithë ndihma humanitare e deponuar në këtë depo prej 1000 metrash katrorë është shkatërruar.
Kjo ishte “tufa” më e madhe e dronëve që Rusia ka dërguar në operacionin ajror që nisi 10 ditë më parë, pas një pauze që nga fillimi i marsit.
Kievi gjithashtu thotë se Moska po bën një përpjekje të fundit për të kapur qytetin e shkatërruar të Bakhmutit, në mënyrë që presidenti Vladimir Putin të mund të marrë çmimin e tij të vetëm nga ofensiva e kushtueshme e dimrit në Ukrainë në kohë për festimet e së nesërmes.
Sirenat ranë për orë të tëra në pothuajse dy të tretat e Ukrainës. Mediat lokale raportuan se shpërthime u dëgjuan në Kherson dhe Zaporizhia, në juglindje.
Vladimir Rogov, një zyrtar i Zaporizhias i emëruar nga Rusia, tha se forcat ruse goditën një magazinë dhe një postë të ushtrisë ukrainase në qytetin e Orihiv. Reuters nuk ishte në gjendje të verifikonte këtë pretendim.
Guvernatori gjithashtu i emëruar nga Rusia i provincës Zaporizhia, Yevgeny Balitsky, tha se rreth 3,000 civilë ishin evakuuar nga zonat pranë vijës së frontit që ishin granatuar. Zaporizhia është një nga zonat ku forcat ukrainase mund të nisin një kundërsulm. /abcnews.al
