Shkruan Agron Hoti
Deri para ca vitesh ka ekzistuar një kritikë gjithandej Kosovës se gjuha helmuese brendapërbrenda skenës politike në Shqipëri ishte e papranueshme dhe pse jo i rrezikshme. Sepse mu për këtë në vitin ’97 në Shqipëri patën shpërthyer përplasje deri në vëllavrasje që patën kulmuar me dështimin e plotë të shtetit shqiptar.
Pasojat e atij kaosi, Tirana zyrtare i vuan edhe sot. Pavarësisht intensitetit, gjuha helmuese politike s’ka të ndalur as sot. Dhe ç’është më e keqja, po të mos kishte zbarkuar NATO në Tiranë mu në ditën e zgjedhjeve parlamentare të prillit 2021, gjasat që ‘97-ta të përsëritej ishin më se reale. Në Kosovë kritikohej shpesh edhe gjuha e vrazhdë dhe toksike nëpër debate politike nëpër televizione shqiptare. Të krijohej përshtypja që ne në Prishtinë s’do të bënim si ata në Tiranë.
Për dallim prej ‘97-tës, ku Prishtina e robëruar nga Serbia s’përzihej në punë të Tiranës zyrtare, në zgjedhjet parlamentare të prillit 2021 një pjesë e politikës së Prishtinës fatkeqësisht po i frynte përçarjes dhe pse jo edhe përplasjes politike në Tiranë, duke u rreshtuar, kështu, hapur pro forcave opozitare atje dhe ç’është më e keqja duke votuar atje, pavarësisht që e njëjta politikë veçse e kishte marrë mandatin për ta qeverisur Kosovën.
Mjerisht, është e njëjta politikë në Kosovë që edhe sot vazhdon ta thellojë hendekun me Shqipërinë dhe me Perëndimin. Si rezultat i kësaj gjuhe toksike shumë qytetarë të ndikuar nga një politikë e tillë kur flasin për Perëndimin, Shqipërinë apo zhvillimet atje, e përsërisin të njëjtën gjuhë që e përdorin politikanët e preferuar të tyre në Prishtinë. Ndërkohë që Tirana zyrtare asnjëherë s’është përzier në zgjedhjet e Kosovës.
Por, nuk është mirë të ngrisësh standardin sa s’mund ta zbatosh. Kështu, Prishtina, lëre që e imitoi gjuhën helmuese të politikës së Tiranës, por duhet pranuar faktin që po të mos ekzistonte frika nga Covid 19 që solli edhe izolimin e qytetarëve, si dhe po të mos ekzistonte prezenca e NATO-s, Kosova në vitin 2020 pa më të voglin dyshim do të kishte kaluar nëpër një ‘97-të të ngjashme, kjo si rezultat i përçarjes brutale që po mbretëronte gjithandej vendit.
Pra, e kritikonim Tiranën, por u bëmë edhe më të zinj. Gjuha helmuese politike që po mbillej në Prishtinë nga një pjesë e politikës së saj që nga viti 2005, s’dallonte dot nga ajo e Tiranës. Si rezultat i kësaj gjuhe helmuese, skena politike në Kosovë është aktualisht aq e përçarë dhe aq e helmuar, sa s’ka më konsensus as për gjërat më banale. Prandaj, Kosova tashmë është futur në krizë të thellë politike, fundi i së cilës s’është më për t’u parë. Derisa deri dje kritikonim Tiranën, sot ia kemi kaluar asaj për gjuhë toksike që po shkatërron shoqërinë, qytetarët dhe vetë shtetin.