Deputetja e VV-së, Mimoza Kusari-Lila, përmes një njoftimi në Facebook njoftoi se e ka vizituar ish ushtarin e UÇK-së që po mbahet në Hagë, Rexhep Selimi.
Kusari-Lila në postimin e saj ka shkruar se gjatë vizitës ka takuar edhe bashkëluftëtarët e Rexhës, tek të cilët sipas saj, kishte unitet, besim dhe vullnet që të gjithë do të dalin faqebardhë nga kjo, siq e ka quajtur Kusari-Lila, sfidë e vendit.
Kusari ka shkruar se me Rexhën dhe të tjerët u përshëndetën me fjalët “shihemi në Kosovë”.
“Sot vizitova mikun dhe bashkëpunëtorin tim Rexhep Selimi në Hagë i cili padrejtësisht po mbahen atje bashkë me krerët tjerë të UÇK-së.
Gjatë vizitës takova edhe bashkëluftëtarët e Rexhës tek të cilët pashë unitetin, vullnetin dhe besimin e palëkundur që nga kjo sfidë e vendit tonë të ri, të gjithë do të dalin faqebardhë!
Sa e rëndësishme aq edhe e ndjeshme është që kjo histori e re e Kosovës të shkruhet ashtu si e meriton që gjeneratat e reja të kuptojnë vlerën e lirisë dhe sakrificës për shtetin tonë.
Me Rexhën dhe tjerët u përshëndetëm me fjalët, shihemi në Kosovë!”, ka shkruar Kusari-Lila. /TV Arbëria