Sot është bërë përurimi i shtatores së profesorit, Anton Çettës. Në oborrin e Universitetit të Prishtinës, shtatorja e tij shfaqet me dorën e zgjatur të pajtimit.
“Plaku i urtë” siç njihej nga populli, ka pajtuar shumë familje të hasmuara në shumë vise të Kosovës.
Kryetari i Prishtinës, Përparim Rama tha se Anton Çetta ishte i veçantë dhe kishte bërë punë të palodhshme në shumë sfera, raporton TV Arbëria.
“Ishte fillimi i viteve të 90-ta, zullumet e pushtimet të atëhershme po u trashnin. Për baraspeshë po punonte edhe trashëgimia e lashtë zakonore. Ai ishte intelektual, studiues… ai themeloi komitetin e faljes së gjakut. Jemi njerëz me shumë fat, që Kosova jonë lindi një njeri kaq të madh. Kjo shtatore që po përurojmë është vepër e skulptorit Agon Qosa”, tha ai.
Profesori Jahja Drançolli tha se kjo shtatore ka një bazë të gjerë intelektuale të profesor Anton Çettës.
“Tradita e faljes së gjakut u hoq nga populli dhe u hodh kundër marrjes së gjakut. Për këtë masivitet flet edhe që më 1990, për herë të parë u mblodhën mbi 500 mijë njerëz. Në vijim të rrugëtimit historik vërejmë se trimëria e Nënë Terezës, Ibrahim Rugovës dhe Anton Çettës po i prezantonte shqiptarët për të vazhduar me qëndresën e UÇK-së”, ka thënë ai.