Mirlind Daku është duke u munduar ta rikthejë dalëngadalë formën optimale, pas lëndimit që e kishte pësuar së fundmi.
Sulmuesi kosovar shkëlqeu në fundjavën që shkoi me Rubin Kazanin, shkruan “Gazeta Express”.
Përfaqësuesi shqiptar ishte protagonist në fitoren e ekipit të tij në kuadër të xhiros së 16-të të Superligës ruse.
Gjilanasi i realizoi dy gola në fitoren e Rubin Kazanit me rezultat 3:0 në shtëpi ndaj ekipit Akron.
Dhe, kjo paraqitje fenomenale e tij u vlerësua lartë nga faqja e specializuar për vlerësimin e lojtarëve dhe të ndeshjeve – Sofascore, e cila ia dha atij notën 9.5
Me këtë rast, ish-futbollisti i Llapit e Ballkanit u përfshi në ekipin ideal të javës në Rusi.
26 vjeçari e ka “shijuar” këtë ndjenjë edhe në të kaluarën falë paraqitjeve pozitive me Rubin Kazanin.
Ai ka realizuar 8 gola dhe i ka bërë 3 asistime në këtë sezon me ekipin e tij, ndërsa u rikthye në Kombëtaren shqiptare në këtë muaj, ndonëse nuk mundi të linte gjurmë.
Nëse vazhdon me formë të tillë, Daku mund të largohet nga Rusia gjatë verës që vjen për t’u transferuar në një klub dhe në një ligë më të fortë evropiane.